اب تلک تند ہواؤں کا اثر باقی ہے

اب تلک تند ہواؤں کا اثر باقی ہے

اک چراغ اور سر راہ گزر باقی ہے

وہ ہماری نہیں سنتا تو گلہ ہے کیسا

اب کہاں اپنی دعاؤں میں اثر باقی ہے

دل میں باقی ہیں فقط چند لہو کے قطرے

اب مرے پاس یہی زاد سفر باقی ہے

پھر بنا لیں گے اسی جا پہ نشیمن اپنا

آشیاں جس پہ تھا وہ شاخ شجر باقی ہے

معصیت اشک ندامت سے بھی دھل جاتی ہے

مطمئن ہوں کہ ابھی دیدۂ تر باقی ہے

جب وہ چاہے مجھے دو نیم کرے آ کے حبابؔ

دست قاتل میں یہی ایک ہنر باقی ہے

ab talak tund hawaon ka asar baqi hai

ik charagh aur sar-e-rah guzar baqi hai

wo hamari nahin sunta to gila hai kaisa

ab kahan apni duaon mein asar baqi hai

dil mein baqi hain faqat chand lahu ke qatre

ab mire pas yahi zad-e-safar baqi hai

phir bana lenge isi ja pe nasheman apna

ashiyan jis pe tha wo shakh-e-shajar baqi hai

maasiyat ashk-e-nadamat se bhi dhul jati hai

mutmain hun ke abhi dida-e-tar baqi hai

jab wo chahe mujhe do nim kare a ke habab

dast-e-qatil mein yahi ek hunar baqi hai