جذبۂ شوق نے یوں داد وفا پائی ہے

جذبۂ شوق نے یوں داد وفا پائی ہے

کھنچ کے منزل مرے قدموں میں چلی آئی ہے

آج تک مٹ نہ سکی ماتھے سے سجدوں کی خلش

ایک مدت سے ترے در پہ جبیں سائی ہے

آئنہ توڑ کے ہاتھوں میں لئے بیٹھے ہیں

عبرت انگیز یہ انجام خود آرائی ہے

آپ آئیں نہ سہی مجھ کو بلائیں نہ سہی

آپ کی یاد رفیق شب تنہائی ہے

مہرباں وہ ہیں تو اغیار پریشاں کیوں ہیں

میری اور ان کی تو برسوں کی شناسائی ہے

کوئی نغمہ کوئی سنگیت کوئی گیت نہیں

زندگی درد میں ڈوبی ہوئی شہنائی ہے

جن کو انکار تھا اب وہ بھی تو کہتے ہیں حبابؔ

تیرے اشعار میں گہرائی ہے گیرائی ہے

jazba-e-shauq ne yun dad-e-wafa pai hai

khinch ke manzil mire qadmon mein chali ai hai

aj tak mit na saki mathe se sajdon ki khalish

ek muddat se tire dar pe jabin sai hai

aina tor ke hathon mein liye baithe hain

ibrat angez ye anjam-e-khud arai hai

ap aen na sahi mujh ko balaen na sahi

ap ki yad rafiq-e-shab-e-tanhai hai

mehrban wo hain to aghyar pareshan kyun hain

meri aur un ki to barson ki shanasai hai

koi naghma koi sangit koi git nahin

zindagi dard mein dubi hui shahnai hai

jin ko inkar tha ab wo bhi to kahte hain habab

tere ashar mein gahrai hai girai hai