تصور میں بہت کیں انجمن آرائیاں ہم نے

تصور میں بہت کیں انجمن آرائیاں ہم نے

سلیقے سے گزاریں اس طرح تنہائیاں ہم نے

عجب کیا ہے جو تم نے وقت کی انگڑائیاں دیکھیں

بدل ڈالی ہیں اکثر وقت کی انگڑائیاں ہم نے

وہیں پر آج شور نالہ و شیون بپا دیکھا

جہاں دیکھی تھیں کل بجتی ہوئی شہنائیاں ہم نے

ہزاروں کلفتیں تھیں زندگی کی راہ میں لیکن

نہ پڑنے دیں غم و آلام کی پرچھائیاں ہم نے

حبابؔ اس دور پر آشوب میں قدر ہنر کیا ہو

سمو کر گرچہ رکھ دیں شعر میں گہرائیاں ہم نے

tasawwur mein bahut kin anjuman araiyan ham ne

saliqe se guzaren is tarah tanhaiyan ham ne

ajab kya hai jo tum ne waqt ki angraiyan dekhen

badal dali hain aksar waqt ki angraiyan ham ne

wahin par aj shor-e-nala-o-shewan bapa dekha

jahan dekhi thin kal bajti hui shahnaiyan ham ne

hazaron kulfaten thin zindagi ki rah mein lekin

na parne den gham-o-alam ki parchhaiyan ham ne

habab is daur pur ashob mein qadar-e-hunar kya ho

samo kar garche rakh den sher mein gahraiyan ham ne