دیار نور میں تیرہ شبوں کا ساتھی ہو
Iftikhar Arif (b. 1943)دیار نور میں تیرہ شبوں کا ساتھی ہو
کوئی تو ہو جو مری وحشتوں کا ساتھی ہو
میں اس سے جھوٹ بھی بولوں تو مجھ سے سچ بولے
مرے مزاج کے سب موسموں کا ساتھی ہو
میں اس کے ہاتھ نہ آؤں وہ میرا ہو کے رہے
میں گر پڑوں تو مری پستیوں کا ساتھی ہو
وہ میرے نام کی نسبت سے معتبر ٹھہرے
گلی گلی مری رسوائیوں کا ساتھی ہو
کرے کلام جو مجھ سے تو میرے لہجے میں
میں چپ رہوں تو مرے تیوروں کا ساتھی ہو
میں اپنے آپ کو دیکھوں وہ مجھ کو دیکھے جائے
وہ میرے نفس کی گمراہیوں کا ساتھی ہو
وہ خواب دیکھے تو دیکھے مرے حوالے سے
مرے خیال کے سب منظروں کا ساتھی ہو
dayar-e-nur mein tira shabon ka sathi ho
koi to ho jo miri wahshaton ka sathi ho
main us se jhut bhi bolun to mujh se sach bole
mire mizaj ke sab mausamon ka sathi ho
main us ke hath na aun wo mera ho ke rahe
main gar parun to miri pastiyon ka sathi ho
wo mere nam ki nisbat se motabar thahre
gali gali miri ruswaiyon ka sathi ho
kare kalam jo mujh se to mere lahje mein
main chup rahun to mire tewaron ka sathi ho
main apne ap ko dekhun wo mujh ko dekhe jae
wo mere nafas ki gumrahiyon ka sathi ho
wo khwab dekhe to dekhe mire hawale se
mire khayal ke sab manzaron ka sathi ho