ہجر کی دھوپ میں چھاؤں جیسی باتیں کرتے ہیں

ہجر کی دھوپ میں چھاؤں جیسی باتیں کرتے ہیں

آنسو بھی تو ماؤں جیسی باتیں کرتے ہیں

رستہ دیکھنے والی آنکھوں کے انہونے خواب

پیاس میں بھی دریاؤں جیسی باتیں کرتے ہیں

خود کو بکھرتے دیکھتے ہیں کچھ کر نہیں پاتے ہیں

پھر بھی لوگ خداؤں جیسی باتیں کرتے ہیں

ایک ذرا سی جوت کے بل پر اندھیاروں سے بیر

پاگل دیئے ہواؤں جیسی باتیں کرتے ہیں

رنگ سے خوشبوؤں کا ناتا ٹوٹتا جاتا ہے

پھول سے لوگ خزاؤں جیسی باتیں کرتے ہیں

ہم نے چپ رہنے کا عہد کیا ہے اور کم ظرف

ہم سے سخن آراؤں جیسی باتیں کرتے ہیں

hijr ki dhup mein chhaon jaisi baten karte hain

ansu bhi to maon jaisi baten karte hain

rasta dekhne wali ankhon ke anhone khwab

pyas mein bhi dariyaon jaisi baten karte hain

khud ko bikharte dekhte hain kuchh kar nahin pate hain

phir bhi log khudaon jaisi baten karte hain

ek zara si jot ke bal par andhiyaron se bair

pagal diye hawaon jaisi baten karte hain

rang se khushbuon ka nata tutta jata hai

phul se log khazaon jaisi baten karte hain

ham ne chup rahne ka ahd kya hai aur kam zarf

ham se sukhan araon jaisi baten karte hain