بکھر جائیں گے ہم کیا جب تماشا ختم ہوگا

بکھر جائیں گے ہم کیا جب تماشا ختم ہوگا

مرے معبود آخر کب تماشا ختم ہوگا

چراغ حجرۂ درویش کی بجھتی ہوئی لو

ہوا سے کہہ گئی ہے اب تماشا ختم ہوگا

کہانی میں نئے کردار شامل ہو گئے ہیں

نہیں معلوم اب کس ڈھب تماشا ختم ہوگا

کہانی آپ الجھی ہے کہ الجھائی گئی ہے

یہ عقدہ تب کھلے گا جب تماشا ختم ہوگا

زمیں جب عدل سے بھر جائے گی نور علیٰ نور

بنام مسلک و مذہب تماشا ختم ہوگا

یہ سب کٹھ پتلیاں رقصاں رہیں گی رات کی رات

سحر سے پہلے پہلے سب تماشا ختم ہوگا

تماشا کرنے والوں کو خبر دی جا چکی ہے

کہ پردہ کب گرے گا کب تماشا ختم ہوگا

دل نا مطمئن ایسا بھی کیا مایوس رہنا

جو خلق اٹھی تو سب کرتب تماشا ختم ہوگا

bikhar jaenge ham kya jab tamasha khatm hoga

mire maabud akhir kab tamasha khatm hoga

charagh-e-hujra-e-darwesh ki bujhti hui lo

hawa se kah gai hai ab tamasha khatm hoga

kahani mein nae kirdar shamil ho gae hain

nahin maalum ab kis dhab tamasha khatm hoga

kahani ap uljhi hai ke uljhai gai hai

ye uqda tab khulega jab tamasha khatm hoga

zamin jab adl se bhar jaegi nur-e-ali nur

banam-e-maslak-o-mazhab tamasha khatm hoga

ye sab kath putliyan raqsan rahengi rat ki rat

sahar se pahle pahle sab tamasha khatm hoga

tamasha karne walon ko khabar di ja chuki hai

ke parda kab girega kab tamasha khatm hoga

dil-e-na mutmain aisa bhi kya mayus rahna

jo khalq uthi to sab kartab tamasha khatm hoga