ہماری ذات میں بستے سبھی ہیں

ہماری ذات میں بستے سبھی ہیں

ہم اچھے ہیں تو پھر اچھے سبھی ہیں

یقیں کیسے کریں وعدے پہ تیرے

یہی وعدہ ہے جو کرتے سبھی ہیں

دکھائی کیوں نہیں دیتا کسی کو

خدا کی کھوج میں نکلے سبھی ہیں

مرے اندر فقط قطرہ نہیں ہے

سمندر جھیل اور جھرنے سبھی ہیں

زمیں پر آئے گا وہ آسماں سے

نظارہ دیکھنے ٹھہرے سبھی ہیں

چلی تھی اک ہوا کچھ دیر پہلے

اسی کے خوف سے سہمے سبھی ہیں

سبق لیتے نہیں ہم کیوں کسی سے

ہمارے سامنے قصے سبھی ہیں

hamari zat mein baste sabhi hain

ham achchhe hain to phir achchhe sabhi hain

yaqin kaise karen waade pe tere

yahi waada hai jo karte sabhi hain

dikhai kyun nahin deta kisi ko

khuda ki khoj mein nikle sabhi hain

mire andar faqat qatra nahin hai

samundar jhil aur jharne sabhi hain

zamin par aega wo asman se

nazara dekhne thahre sabhi hain

chali thi ik hua kuchh der pahle

usi ke khauf se sahme sabhi hain

sabaq lete nahin ham kyun kisi se

hamare samne qisse sabhi hain