اہل محبت کی مجبوری بڑھتی جاتی ہے

اہل محبت کی مجبوری بڑھتی جاتی ہے

مٹی سے گلاب کی دوری بڑھتی جاتی ہے

محرابوں سے محل سرا تک ڈھیروں ڈھیر چراغ

جلتے جاتے ہیں بے نوری بڑھتی جاتی ہے

کاروبار میں اب کے خسارہ اور طرح کا ہے

کام نہیں بڑھتا مزدوری بڑھتی جاتی ہے

جیسے جیسے جسم تشفی پاتا جاتا ہے

ویسے ویسے قلب سے دوری بڑھتی جاتی ہے

گریۂ نیم شبی کی نعمت جب سے بحال ہوئی

ہر لحظہ امید حضوری بڑھتی جاتی ہے

ahl-e-mohabbat ki majburi barhti jati hai

mitti se gulab ki duri barhti jati hai

mehrabon se mahal sara tak dheron dher charagh

jalte jate hain be nuri barhti jati hai

karobar mein ab ke khasara aur tarah ka hai

kam nahin barhta mazduri barhti jati hai

jaise jaise jism tashaffi pata jata hai

waise waise qalb se duri barhti jati hai

girya-e-nim shbai ki nemat jab se bahal hui

har lahza ummid huzuri barhti jati hai