خواب دیکھنے والی آنکھیں پتھر ہوں گی تب سوچیں گے

خواب دیکھنے والی آنکھیں پتھر ہوں گی تب سوچیں گے

سندر کومل دھیان تتلیاں بے پر ہوں گی تب سوچیں گے

رس برسانے والے بادل اور طرف کیوں اڑ جاتے ہیں

ہری بھری شاداب کھیتیاں بنجر ہوں گی تب سوچیں گے

بستی کی دیوار پہ کس نے ان ہونی باتیں لکھ دی ہیں

اس ان جانے ڈر کی باتیں گھر گھر ہوں گی تب سوچیں گے

مانگے کے پھولوں سے کب تک روپ سروپ کا مان بڑھے گا

اپنے آنگن کی مہکاریں بے گھر ہوں گی تب سوچیں گے

بیتی رت کی سب پہچانیں بھول گئے تو پھر کیا ہوگا

گئے دنوں کی یادیں جب بے منظر ہوں گی تب سوچیں گے

آنے والے کل کا سواگت کیسے ہوگا کون کرے گا

جلتے ہوئے سورج کی کرنیں سر پر ہوں گی تب سوچیں گے

khwab dekhne wali ankhen patthar hongi tab sochenge

sundar komal dhyan titliyan be par hongi tab sochenge

ras barasane wale badal aur taraf kyun ur jate hain

hari bhari shadab khetiyan banjar hongi tab sochenge

basti ki diwar pe kis ne un honi baten likh di hain

is an jane dar ki baten ghar ghar hongi tab sochenge

mange ke phulon se kab tak rup sarup ka man barhega

apne angan ki mahkaren be ghar hongi tab sochenge

biti rut ki sab pahchanen bhul gae to phir kya hoga

gae dinon ki yaden jab be manzar hongi tab sochenge

ane wale kal ka suagat kaise hoga kaun karega

jalte hue suraj ki kirnen sar par hongi tab sochenge