وفا کی خیر مناتا ہوں بے وفائی میں بھی

وفا کی خیر مناتا ہوں بے وفائی میں بھی

میں اس کی قید میں ہوں قید سے رہائی میں بھی

لہو کی آگ میں جل بجھ گئے بدن تو کھلا

رسائی میں بھی خسارہ ہے نارسائی میں بھی

بدلتے رہتے ہیں موسم گزرتا رہتا ہے وقت

مگر یہ دل کہ وہیں کا وہیں جدائی میں بھی

لحاظ حرمت پیماں نہ پاس ہم خوابی

عجب طرح کے تصادم تھے آشنائی میں بھی

میں دس برس سے کسی خواب کے عذاب میں ہوں

وہی عذاب در آیا ہے اس دہائی میں بھی

تصادم دل و دنیا میں دل کی ہار کے بعد

حجاب آنے لگا ہے غزل سرائی میں بھی

میں جا رہا ہوں اب اس کی طرف اسی کی طرف

جو میرے ساتھ تھا میری شکستہ پائی میں بھی

wafa ki khair manata hun be wafai mein bhi

main us ki qaid mein hun qaid se rihai mein bhi

lahu ki ag mein jal bujh gae badan to khula

rasai mein bhi khasara hai narasai mein bhi

badalte rahte hain mausam guzarta rahta hai waqt

magar ye dil ke wahin ka wahin judai mein bhi

lihaz hurmat-e-paiman na pas ham khwabi

ajab tarah ke tasadum the ashnai mein bhi

main das baras se kisi khwab ke azab mein hun

wahi azab dar aya hai is duhai mein bhi

tasadum-e-dil-o-duniya mein dil ki har ke baad

hijab ane laga hai ghazal sarai mein bhi

main ja raha hun ab us ki taraf usi ki taraf

jo mere sath tha meri shikasta pai mein bhi