ہم اپنے رفتگاں کو یاد رکھنا چاہتے ہیں

ہم اپنے رفتگاں کو یاد رکھنا چاہتے ہیں

دلوں کو درد سے آباد رکھنا چاہتے ہیں

مبادا مندمل زخموں کی صورت بھول ہی جائیں

ابھی کچھ دن یہ گھر برباد رکھنا چاہتے ہیں

بہت رونق تھی ان کے دم قدم سے شہر جاں میں

وہی رونق ہم ان کے بعد رکھنا چاہتے ہیں

بہت مشکل زمانوں میں بھی ہم اہل محبت

وفا پر عشق کی بنیاد رکھنا چاہتے ہیں

سروں میں ایک ہی سودا کہ لو دینے لگے خاک

امیدیں حسب استعداد رکھنا چاہتے ہیں

کہیں ایسا نہ ہو حرف دعا مفہوم کھو دے

دعا کو صورت فریاد رکھنا چاہتے ہیں

قلم آلودۂ نان و نمک رہتا ہے پھر بھی

جہاں تک ہو سکے آزاد رکھنا چاہتے ہیں

ham apne raftagan ko yad rakhna chahte hain

dilon ko dard se abad rakhna chahte hain

mabada mundamil zakhmon ki surat bhul hi jaen

abhi kuchh din ye ghar barbad rakhna chahte hain

bahut raunaq thi un ke dam qadam se shahr-e-jan mein

wahi raunaq ham un ke baad rakhna chahte hain

bahut mushkil zamanon mein bhi ham ahl-e-mohabbat

wafa par ishq ki buniyad rakhna chahte hain

saron mein ek hi sauda ke lo dene lage khak

ummiden hasb-e-istedad rakhna chahte hain

kahin aisa na ho harf-e-dua mafhum kho de

dua ko surat-e-fariyad rakhna chahte hain

qalam aluda-e-nan-o-namak rahta hai phir bhi

jahan tak ho sake azad rakhna chahte hain