گلی کوچوں میں ہنگامہ بپا کرنا پڑے گا

گلی کوچوں میں ہنگامہ بپا کرنا پڑے گا

جو دل میں ہے اب اس کا تذکرہ کرنا پڑے گا

نتیجہ کربلا سے مختلف ہو یا وہی ہو

مدینہ چھوڑنے کا فیصلہ کرنا پڑے گا

وہ کیا منزل جہاں سے راستے آگے نکل جائیں

سو اب پھر اک سفر کا سلسلہ کرنا پڑے گا

لہو دینے لگی ہے چشم خوں بستہ سو اس بار

بھری آنکھوں سے خوابوں کو رہا کرنا پڑے گا

مبادا قصۂ اہل جنوں نا گفتہ رہ جائے

نئے مضمون کا لہجہ نیا کرنا پڑے گا

درختوں پر ثمر آنے سے پہلے آئے تھے پھول

پھلوں کے بعد کیا ہوگا پتہ کرنا پڑے گا

گنوا بیٹھے تری خاطر ہم اپنے مہر و ماہتاب

بتا اب اے زمانے اور کیا کرنا پڑے گا

gali kuchon mein hangama bapa karna parega

jo dil mein hai ab us ka tazkira karna parega

natija karbala se mukhtalif ho ya wahi ho

madina chhorne ka faisla karna parega

wo kya manzil jahan se raste age nikal jaen

so ab phir ik safar ka silsila karna parega

lahu dene lagi hai chashm-e-khun basta so is bar

bhari ankhon se khwabon ko raha karna parega

mabada qissa-e-ahl-e-junun na gufta rah jae

nae mazmun ka lahja naya karna parega

darakhton par samar ane se pahle ae the phul

phalon ke baad kya hoga pata karna parega

ganwa baithe tiri khatir ham apne mehr-o-mahtab

bata ab ai zamane aur kiya karna parega