لفظ ابھی ایجاد ہوں گے ہر ضرورت کے لیے

لفظ ابھی ایجاد ہوں گے ہر ضرورت کے لیے

شرح راحت کے لیے غم کی صراحت کے لیے

اب مرا چپ چاپ رہنا امر مجبوری سہی

میں نے کھولی ہی زباں کب تھی شکایت کے لیے

میرے چشم و گوش و لب سے پوچھ لو سب کچھ یہیں

مجھ کو میرے سامنے لاؤ شہادت کے لیے

سخت کوشی سخت جانی کی طرف لائی مجھے

مجھ کو یہ فرصت غنیمت ہے علالت کے لیے

آکسیجن سے شبستان عناصر تابناک

مضطرب ہر ذی نفس اس کی رفاقت کے لیے

مر گئے کچھ لوگ جینے کا مداوا سوچ کر

اور کچھ جیتے رہے جینے کی عادت کے لیے

آہ مرگ آدمی پر آدمی روئے بہت

کوئی بھی رویا نہ مرگ آدمیت کے لیے

کوئی موقع زندگی کا آخری موقع نہیں

اس قدر تعجیل کیوں رفع کدورت کے لیے

استقامت اے مرے دیر آشنائے غم گسار

ایک آنسو ہے بہت حسن ندامت کے لیے

کوئی ناصرؔ کی غزل کوئی ظفر کی مے ترنگ

چاہیے کچھ تو مری شام عیادت کے لیے

گلشن آباد جہاں میں صورت شبنم حفیظؔ

ہم اگر روئے بھی تو رونے کی فرصت کے لیے

lafz abhi ijad honge har zarurat ke liye

sharh-e-rahat ke liye gham ki sarahat ke liye

ab mira chup chap rahna amar majburi sahi

main ne kholi hi zaban kab thi shikayat ke liye

mere chashm-o-gosh-o-lab se puchh lo sab kuchh yahin

mujh ko mere samne lao shahadat ke liye

sakht koshi sakht jani ki taraf lai mujhe

mujh ko ye fursat ghanimat hai alalat ke liye

aksijan se shabistan-e-anasir tabnak

muztarib har zi nafas us ki rifaqat ke liye

mar gae kuchh log jine ka mudawa soch kar

aur kuchh jite rahe jine ki adat ke liye

ah marg-e-admi par admi roe bahut

koi bhi roya na marg-e-admiyyat ke liye

koi mauqaa zindagi ka akhiri mauqaa nahin

is qadar taajil kyun raf-e-kudurat ke liye

istiqamat ai mire der ashna-e-gham gusar

ek ansu hai bahut husn-e-nadamat ke liye

koi nasir ki ghazal koi zafar ki mai tarang

chahiye kuchh to miri sham-e-ayadat ke liye

gulshan abad-e-jahan mein surat-e-shabnam hafiz

ham agar roe bhi to rone ki fursat ke liye