نرگس پہ تو الزام لگا بے بصری کا

نرگس پہ تو الزام لگا بے بصری کا

ارباب گلستاں پہ نہیں کم نظری کا

توفیق رفاقت نہیں ان کو سر منزل

رستے میں جنہیں پاس رہا ہم سفری کا

اب خانقہ و مدرسہ و مے کدہ ہیں ایک

اک سلسلہ ہے قافلۂ بے خبری کا

ہر نقش ہے آئینۂ نیرنگ تماشا

دنیا ہے کہ حاصل مری حیراں نظری کا

اب فرش سے تا عرش زبوں حال ہے فطرت

اک معرکہ در پیش ہے عزم بشری کا

کب ملتی ہے یہ دولت بیدار کسی کو

اور میں ہوں کہ رونا ہے اسی دیدہ وری کا

بے واسطۂ عشق بھی رنگ رخ پرویز

عنوان ہے فرہاد کی خونیں جگری کا

آخر ترے در پہ مجھے لے آئی محبت

دیکھا نہ گیا حال مری در بدری کا

دل میں ہو فقط تم ہی تم آنکھوں پہ نہ جاؤ

آنکھوں کو تو ہے روگ پریشاں نظری کا

بے پیرویٔ میرؔ حفیظؔ اپنی روش ہے

ہم پر کوئی الزام نہیں کم ہنری کا

nargis pe to ilzam laga be basari ka

arbab-e-gulistan pe nahin kam nazari ka

taufiq-e-rifaqat nahin un ko sar-e-manzil

raste mein jinhen pas raha ham safari ka

ab khanqa-o-madrasa-o-mai kada hain ek

ik silsila hai qafila-e-be khabari ka

har naqsh hai aina-e-nairang-e-tamasha

duniya hai ke hasil miri hairan nazari ka

ab farsh se ta arsh-e-zabun hal hai fitrat

ik marka dar pesh hai azm-e-bashari ka

kab milti hai ye daulat-e-bedar kisi ko

aur main hun ke rona hai isi dida wari ka

be wasta-e-ishq bhi rang-e-rukh parwez

unwan hai farhad ki khunin jigri ka

akhir tire dar pe mujhe le ai mohabbat

dekha na gaya hal miri dar badri ka

dil mein ho faqat tum hi tum ankhon pe na jao

ankhon ko to hai rog pareshan nazari ka

be pairawi-e-mir hafiz apni rawish hai

ham par koi ilzam nahin kam hunari ka