محبت کرنے والے کم نہ ہوں گے

محبت کرنے والے کم نہ ہوں گے

تری محفل میں لیکن ہم نہ ہوں گے

میں اکثر سوچتا ہوں پھول کب تک

شریک گریۂ شبنم نہ ہوں گے

ذرا دیر آشنا چشم کرم ہے

ستم ہی عشق میں پیہم نہ ہوں گے

دلوں کی الجھنیں بڑھتی رہیں گی

اگر کچھ مشورے باہم نہ ہوں گے

زمانے بھر کے غم یا اک ترا غم

یہ غم ہوگا تو کتنے غم نہ ہوں گے

کہوں بے درد کیوں اہل جہاں کو

وہ میرے حال سے محرم نہ ہوں گے

ہمارے دل میں سیل گریہ ہوگا

اگر با دیدۂ پر نم نہ ہوں گے

اگر تو اتفاقاً مل بھی جائے

تری فرقت کے صدمے کم نہ ہوں گے

حفیظؔ ان سے میں جتنا بد گماں ہوں

وہ مجھ سے اس قدر برہم نہ ہوں گے

mohabbat karne wale kam na honge

tiri mahfil mein lekin ham na honge

main aksar sochta hun phul kab tak

sharik-e-girya-e-shabnam na honge

zara der ashna chashm-e-karam hai

sitam hi ishq mein paiham na honge

dilon ki uljhanen barhti rahengi

agar kuchh mashware baham na honge

zamane bhar ke gham ya ik tira gham

ye gham hoga to kitne gham na honge

kahun be dard kyun ahl-e-jahan ko

wo mere hal se mahram na honge

hamare dil mein sail-e-girya hoga

agar ba dida-e-pur nam na honge

agar to ittifaqan mil bhi jae

tiri furqat ke sadme kam na honge

hafiz un se main jitna bad guman hun

wo mujh se is qadar barham na honge