بڑے غضب کا ہے یارو بڑے عذاب کا زخم

بڑے غضب کا ہے یارو بڑے عذاب کا زخم

اگر شباب ہی ٹھہرا مرے شباب کا زخم

ذرا سی بات تھی کچھ آسماں نہ پھٹ پڑتا

مگر ہرا ہے ابھی تک ترے جواب کا زخم

زمیں کی کوکھ ہی زخمی نہیں اندھیروں سے

ہے آسماں کے بھی سینے پہ آفتاب کا زخم

میں سنگسار جو ہوتا تو پھر بھی خوش رہتا

کھٹک رہا ہے مگر دل میں اک گلاب کا زخم

اسی کی چارہ گری میں گزر گئی اسرارؔ

تمام عمر کو کافی تھا اک شباب کا زخم

bare ghazab ka hai yaro bare azab ka zakhm

agar shabab hi thahra mire shabab ka zakhm

zara si bat thi kuchh asman na phat parta

magar hara hai abhi tak tire jawab ka zakhm

zamin ki kokh hi zakhmi nahin andheron se

hai asman ke bhi sine pe aftab ka zakhm

main sangsar jo hota to phir bhi khush rahta

khatak raha hai magar dil mein ik gulab ka zakhm

usi ki chara giri mein guzar gai asrar

tamam umr ko kafi tha ik shabab ka zakhm