یوں زندگی کے لئے بے قرار ہیں ہم لوگ

یوں زندگی کے لئے بے قرار ہیں ہم لوگ

شکایتوں کے لئے شرمسار ہیں ہم لوگ

ابھی کسی کی نظر سے رہا ہوئے ہیں ہم

ابھی کسی کی نظر میں فرار ہیں ہم لوگ

چھپا رہے ہیں غموں کو یوں مسکرا کر ہم

نئی صدی کے نئے اشتہار ہیں ہم لوگ

شمار یوں تو ہمارا کہیں نہیں لیکن

سبھی یہ کہتے ہیں کہ بے شمار ہیں ہم لوگ

بکھر رہے ہیں ابھی ہم سنور رہے ہیں ابھی

کبھی ہیں خوش تو کبھی سوگوار ہیں ہم لوگ

چکا رہے ہیں ابھی قسط آرزو کو ہم

یوں حسرتوں کے ابھی قرض دار ہیں ہم لوگ

مہک رہی ہیں فضائیں ابھی پسینے سے

نئی امید کی فصل بہار ہیں ہم لوگ

yun zindagi ke liye be qarar hain ham log

shikayaton ke liye sharmsar hain ham log

abhi kisi ki nazar se raha hue hain ham

abhi kisi ki nazar mein farar hain ham log

chhupa rahe hain ghamon ko yun muskura kar ham

nai sadi ke nae ishtihar hain ham log

shumar yun to hamara kahin nahin lekin

sabhi ye kahte hain ke be shumar hain ham log

bikhar rahe hain abhi ham sanwar rahe hain abhi

kabhi hain khush to kabhi sogwar hain ham log

chuka rahe hain abhi qist-e-arzu ko ham

yun hasraton ke abhi qarz dar hain ham log

mahak rahi hain fazaen abhi pasine se

nai umid ki fasl-e-bahar hain ham log