اگر وہ جھوٹ بھی بولے تو ہم سچ مان لیتے ہیں

اگر وہ جھوٹ بھی بولے تو ہم سچ مان لیتے ہیں

نقابوں میں چھپے چہروں کو ہم پہچان لیتے ہیں

ضرورت تیر یا تلوار کی ان کو نہیں ہوتی

نظر کی مار سے وہ عاشقوں کی جان لیتے ہیں

وہاں تو جس کو بھی جانا ہے خالی ہاتھ جانا ہے

نہ جانے لوگ پھر کیوں اس قدر سامان لیتے ہیں

عنایت کی کرم کی اک نظر کرتے ہیں بدلے میں

کبھی وہ جان لیتے ہیں کبھی ایمان لیتے ہیں

ارادے پر اٹل رہتے ہیں اے آغازؔ ہم اپنے

وہی سب کر گزرتے ہیں جو من میں ٹھان لیتے ہیں

agar wo jhut bhi bole to ham sach man lete hain

naqabon mein chhupe chehron ko ham pahchan lete hain

zarurat tir ya talwar ki un ko nahin hoti

nazar ki mar se wo ashiqon ki jan lete hain

wahan to jis ko bhi jana hai khali hath jana hai

na jane log phir kyun is qadar saman lete hain

inayat ki karam ki ik nazar karte hain badle mein

kabhi wo jan lete hain kabhi iman lete hain

irade par atal rahte hain ai aghaz ham apne

wahi sab kar guzarte hain jo man mein than lete hain