یوں پہنچنا ہے مجھے روح کی طغیانی تک

یوں پہنچنا ہے مجھے روح کی طغیانی تک

جس طرح رسی سے جاتا ہے گھڑا پانی تک

کاٹنی پڑتی ہے ناخن سے تکن کی زنجیر

یوں ہی آتی نہیں مشکل کوئی آسانی تک

زندگی تجھ سے بنائے ہوئے رشتے کی ہوس

مجھ کو لے آئی ہے دنیا کی پریشانی تک

ایسے جراحوں کا قبضہ ہے سخن پر افسوس

کر نہیں سکتے جو لفظوں کی مسلمانی تک

اپنے اندر میں کیا کرتا ہوں راجا کی تلاش

اس وسیلے سے پہنچنا ہے مجھے رانی تک

ایسے لفظوں کو بھی بے عیب بنایا ہم نے

جن کی جائز ہی نہیں ہوتی تھی قربانی تک

حسن کا پاؤں دباتی ہے جہاں شوخ ہوا

عشق لے آیا ہے مجھ کو اسی ویرانی تک

فیضؔ ہم لوگ ہیں اک ایسی کچہری کے وکیل

فوجداری سے پہنچتے ہیں جو دیوانی تک

yun pahunchna hai mujhe ruh ki tughyani tak

jis tarah rassi se jata hai ghara pani tak

katni parti hai nakhun se takan ki zanjir

yun hi ati nahin mushkil koi asani tak

zindagi tujh se banae hue rishte ki hawas

mujh ko le ai hai duniya ki pareshani tak

aise jarrahon ka qabza hai sukhan par afsos

kar nahin sakte jo lafzon ki musalmani tak

apne andar mein kya karta hun raja ki talash

is wasile se pahunchna hai mujhe rani tak

aise lafzon ko bhi be aib banaya ham ne

jin ki jaiz hi nahin hoti thi qurbani tak

husn ka paon dabati hai jahan shokh hua

ishq le aya hai mujh ko isi wirani tak

faiz ham log hain ik aisi kachahri ke wakil

faujdari se pahunchte hain jo diwani tak