نہ تو ہم بحر سے واقف نہ سخن جانتے ہیں

نہ تو ہم بحر سے واقف نہ سخن جانتے ہیں

کیسے دیں لفظوں کو ترتیب یہ فن جانتے ہیں

وہ کسی طور بھی تجھ کو نہ لگائیں گے گلے

اے خوشی جو بھی ترا چال چلن جانتے ہیں

دل کے مندر میں ہیں دو ایک پجاری ایسے

جو نہ پوجا نہ عبادت نہ بھجن جانتے ہیں

اس لئے تھام کے رکھا ہے جنوں کا دامن

اے خرد ہم ترا دیوالیہ پن جانتے ہیں

جو محبت کے ہیں الفاظ مرے ہونٹوں پر

وہ تعصب کا ترے چیر ہرن جانتے ہیں

پاؤں پھیلاتے ہیں اتنا کہ ہے جتنی چادر

اپنی اوقات ہے کیا خوب اپن جانتے ہیں

na to ham bahr se waqif na sukhan jante hain

kaise den lafzon ko tartib ye fan jante hain

wo kisi taur bhi tujh ko na lagaenge gale

ai khushi jo bhi tira chal chalan jante hain

dil ke mandir mein hain do ek pujari aise

jo na puja na ibadat na bhajan jante hain

is liye tham ke rakha hai junun ka daman

ai khirad ham tira dewilaya pan jante hain

jo mohabbat ke hain alfaz mire honton par

wo taassub ka tire chir hiran jante hain

paon phailate hain itna ke hai jitni chadar

apni auqat hai kya khub apan jante hain