دن اترتے ہی نئی شام پہن لیتا ہوں

دن اترتے ہی نئی شام پہن لیتا ہوں

میں تری یادوں کا احرام پہن لیتا ہوں

میرے گھر والے بھی تکلیف میں آ جاتے ہیں

میں جو کچھ دیر کو آرام پہن لیتا ہوں

رات کو اوڑھ کے سو جاتا ہوں دن بھر کی تھکن

صبح کو پھر سے کئی کام پہن لیتا ہوں

جب بھی پردیس میں یاد آتا ہے گھر کا نقشہ

میں تصور میں در و بام پہن لیتا ہوں

ایک چاندی کی انگوٹھی کے حوالے سے فقط

اپنی انگلی میں ترا نام پہن لیتا ہوں

فیضؔ یوں رکھتا ہوں میں اس کی محبت کا بھرم

اس کے حصے کے بھی الزام پہن لیتا ہوں

din utarte hi nai sham pahan leta hun

main tiri yadon ka ehram pahan leta hun

mere ghar wale bhi taklif mein a jate hain

main jo kuchh der ko aram pahan leta hun

rat ko orh ke so jata hun din bhar ki thakan

subh ko phir se kai kam pahan leta hun

jab bhi pardes mein yad ata hai ghar ka naqsha

main tasawwur mein dar-o-bam pahan leta hun

ek chandi ki anguthi ke hawale se faqat

apni ungli mein tira nam pahan leta hun

faiz yun rakhta hun main us ki mohabbat ka bharam

us ke hisse ke bhi ilzam pahan leta hun