بھنگ کھاتے ہیں نہ گانجا نہ چرس پیتے ہیں

بھنگ کھاتے ہیں نہ گانجا نہ چرس پیتے ہیں

ہم وہ بھنورے ہیں جو احساس کا رس پیتے ہیں

آپ اس ڈھنگ سے امرت بھی نہیں پی سکتے

جس ہنر مندی سے ہم اشک نفس پیتے ہیں

سب یہیں چھوڑ کے جانا ہے خبر ہے لیکن

پھر یہ ہم کس لئے دنیا کی ہوس پیتے ہیں

جو تری یاد کے کیڑے ہیں بدن کے اندر

وہ مری روح کو کھاتے ہیں پلس پیتے ہیں

تب کہیں ہوتا ہے اک شہد کا چھتا تیار

ان گنت پھولوں کا خوں جب یہ مگس پیتے ہیں

آپ اک بوند بھی پی لیں تو غشی آ جائے

غم کے آنسو جو اسیران قفس پیتے ہیں

فیضؔ کی فکر کی بوتل میں ہے جو زہر سخن

دیکھنا ہے کی ابھی کتنے برس پیتے ہیں

bhang khate hain na ganja na chars pite hain

ham wo bhuniware hain jo ehsas ka ras pite hain

ap is dhang se amrit bhi nahin pi sakte

jis hunar mandi se ham ashk nafas pite hain

sab yahin chhor ke jana hai khabar hai lekin

phir ye ham kis liye duniya ki hawas pite hain

jo tiri yad ke kire hain badan ke andar

wo miri ruh ko khate hain palas pite hain

tab kahin hota hai ik shahd ka chhanta tayyar

an ginat phulon ka khun jab ye magas pite hain

ap ik bund bhi pi len to ghashi a jae

gham ke ansu jo asiran-e-qafas pite hain

faiz ki fikr ki botal mein hai jo zahr sukhan

dekhna hai ki abhi kitne baras pite hain