تمام حسن و معانی کا رنگ اڑنے لگا

تمام حسن و معانی کا رنگ اڑنے لگا

کھلی جو دھوپ تو پانی کا رنگ اڑنے لگا

اشارا کرتی ہیں چہرے کی جھریاں چپ چاپ

تو کیا بدن سے جوانی کا رنگ اڑنے لگا

جدید رنگ میں آیا جو مصرع اولیٰ

حسد سے مصرع ثانی کا رنگ اڑنے لگا

کتاب زیست کے مفہوم کو سمجھتے ہی

یہاں بڑے بڑے گیانی کا رنگ اڑنے لگا

جو دائمی تھا وہی رہ گیا ہے ذہنوں میں

جو عارضی تھا کہانی کا رنگ اڑنے لگا

مری نظر سے ملی فیضؔ جب نظر اس کی

تو میرے دشمن جانی کا رنگ اڑنے لگا

tamam husn-o-maani ka rang urne laga

khuli jo dhup to pani ka rang urne laga

ishara karti hain chehre ki jhiriyan chup chap

to kya badan se jawani ka rang urne laga

jadid rang mein aya jo misra-e-aula

hasad se misra-e-sani ka rang urne laga

kitab-e-zist ke mafhum ko samajhte hi

yahan bare bare giyani ka rang urne laga

jo daimi tha wahi rah gaya hai zehnon mein

jo arzi tha kahani ka rang urne laga

miri nazar se mili faiz jab nazar us ki

tu mere dushman-e-jani ka rang urne laga