بات بن جائے جو تفصیل سے باتیں کر لے

بات بن جائے جو تفصیل سے باتیں کر لے

تشنگی میری اگر جھیل سے باتیں کر لے

جہاں کے گاؤں سے تاریکی نکل سکتی ہے

دل اگر فکر کی قندیل سے باتیں کر لے

تو خریدار مرے دل کی زمیں کا ہے ٹھہر

پہلے دل روح کی تحصیل سے باتیں کر لے

کعبۂ دل تجھے محفوظ اگر رکھنا ہے

جا کے الفت کی ابابیل سے باتیں کر لے

صرف قرآں کے علاوہ ہے بھلا کس کی مجال

جو کہ تورات سے انجیل سے باتیں کر لے

وہ سہولت ہمیں گوگل نے فراہم کی ہے

پل میں انسان برازیل سے باتیں کر لے

عاقبت اپنی بنانی ہے اگر فیضؔ تجھے

نفس کی اڑتی ہوئی چیل سے باتیں کر لے

bat ban jae jo tafsil se baten kar le

tishnagi meri agar jhil se baten kar le

jahan ke gaon se tariki nikal sakti hai

dil agar fikr ki qindil se baten kar le

tu kharidar mire dil ki zamin ka hai thahar

pahle dil ruh ki tahsil se baten kar le

kaaba-e-dil tujhe mahfuz agar rakhna hai

ja ke ulfat ki ababil se baten kar le

sirf quran ke alawa hai bhala kis ki majal

jo ke taurat se injil se baten kar le

wo suhulat hamen gogul ne faraham ki hai

pal mein insan burazil se baten kar le

aqibat apni banani hai agar faiz tujhe

nafas ki urti hui chil se baten kar le