جو دل کو پہلے میسر تھا کیا ہوا اس کا

جو دل کو پہلے میسر تھا کیا ہوا اس کا

جو اس سکون سے بہتر تھا کیا ہوا اس کا

کہاں لیے چلی جاتی ہے مجھ کو ویرانی

یہیں کہیں پہ مرا گھر تھا کیا ہوا اس کا

کچھ ایسے اشک پئے ہیں کہ اب خبر ہی نہیں

اس آنکھ میں جو سمندر تھا کیا ہوا اس کا

نظر گئی سو گئی پر کوئی بتائے مجھے

بڑے کمال کا منظر تھا کیا ہوا اس کا

یہ سوچنے نہیں دیتا ستم گروں کا ہجوم

کہ وہ جو پہلا ستمگر تھا کیا ہوا اس کا

میں صبح خواب سے جاگا تو یہ خیال آیا

جو رات میرے برابر تھا کیا ہوا اس کا

میں جس کے ہاتھ لگا ہوں اسے مبارک ہو

مگر جو میرا مقدر تھا کیا ہوا اس کا

jo dil ko pahle muyassar tha kya hua us ka

jo is sukun se behtar tha kya hua us ka

kahan liye chali jati hai mujh ko wirani

yahin kahin pe mira ghar tha kya hua us ka

kuchh aise ashk piye hain ke ab khabar hi nahin

is ankh mein jo samundar tha kya hua us ka

nazar gai so gai par koi batae mujhe

bare kamal ka manzar tha kya hua us ka

ye sochne nahin deta sitam garon ka hujum

ke wo jo pahla sitamgar tha kya hua us ka

main subh khwab se jaga to ye khayal aya

jo rat mere barabar tha kya hua us ka

main jis ke hath laga hun use mubarak ho

magar jo mera muqaddar tha kya hua us ka