تمہارے آنے سے کچھ نہ پوچھو ہمیں نئی زندگی ملے گی

تمہارے آنے سے کچھ نہ پوچھو ہمیں نئی زندگی ملے گی

قرار دل کو جگر کو راحت نگاہ کو روشنی ملے گی

بہار تازہ جو آ گئی ہے تو زخم کو تازگی ملے گی

جگر کو بھی داغ غم ملیں گے نظر کو بھی کچھ نمی ملے گی

ہیں ساز ہستی کئی طرح کے مگر ہے مقصود ایک سب کا

الگ الگ نغمے ہوں تو کیا ہے صدا تو بس ایک سی ملے گی

وفا کی نگری میں کوئی جاکر وفا شعاروں کا حال دیکھے

دھواں دھواں سے ملیں گے چہرے لٹی لٹی زندگی ملے گی

یہی ہے دستور عشق و الفت یہی ہے انجام عاشقی کا

ہماری آنکھوں میں اشک ہوں گے لبوں پہ ان کے ہنسی ملے گی

اگر پریشان حال ہوں میں تو تم کو کیوں اضطراب ہے یوں

تمہیں نے دی بد دعا یہ مجھ کو کبھی نہ تم کو خوشی ملے گی

قدم قدم پر لگے گی ٹھوکر اگر خرد سے نہ کام لو گے

اگر چلو گے سنبھل کے نازیؔ تو راہ فردوس کی ملے گی

tumhare ane se kuchh na puchho hamen nai zindagi milegi

qarar-e-dil ko jigar ko rahat nigah ko raushni milegi

bahar taza jo a gai hai to zakhm ko tazgi milegi

jigar ko bhi dagh-e-gham milenge nazar ko bhi kuchh nami milegi

hain saz-e-hasti kai tarah ke magar hai maqsud ek sab ka

alag alag naghme hun to kya hai sada to bas ek si milegi

wafa ki nagri mein koi jakar wafa shiaron ka hal dekhe

dhuan dhuan se milenge chehre luti luti zindagi milegi

yahi hai dastur ishq-o-ulfat yahi hai anjam ashiqi ka

hamari ankhon mein ashk honge labon pe un ke hansi milegi

agar pareshan hal hun main to tum ko kyun iztirab hai yun

tumhen ne di bad dua ye mujh ko kabhi na tum ko khushi milegi

qadam qadam par lagegi thokar agar khirad se na kam loge

agar chaloge sambhal ke nazi to rah firdaus ki milegi