اسی جہاز کے صحرا میں ڈوب جانے کی

اسی جہاز کے صحرا میں ڈوب جانے کی

خبر ملی تھی مجھے خواب میں خزانے کی

بہت سے دیدہ و نادیدہ خواب سامنے تھے

اک ایسی سمت تھی کروٹ مرے سرہانے کی

میں اس جگہ پہ جو اک دن پلٹ کے آیا تو

کوئی بھی چیز نہیں تھی مرے زمانے کی

ہر ایک کام سہولت سے ہوتا رہتا تھا

کوئی خلش نہیں ہوتی تھی کر دکھانے کی

میں اک خیال کا خیمہ لگائے بیٹھا تھا

بہت جگہ تھی مرے پاس سر چھپانے کی

وہ کیا خوشی تھی جو دل میں بحال رہتی تھی

مگر وجہ نہیں بنتی تھی مسکرانے کی

اک ایسے وقت میں وہ دونوں ہو گئے آباد

جہاں کسی کو اجازت نہیں تھی آنے کی

عجیب دشت تھا جو مجھ سے داد چاہتا تھا

قریب پھیلے ہوئے دور کے زمانے کی

تمام شہر میں پوری طرح خموشی تھی

مجھے پڑی تھی کوئی گیت گنگنانے کی

isi jahaz ke sahra mein dub jane ki

khabar mili thi mujhe khwab mein khazane ki

bahut se dida-o-nadida khwab samne the

ik aisi samt thi karwat mire sirhane ki

main is jagah pe jo ik din palat ke aya to

koi bhi chiz nahin thi mire zamane ki

har ek kam suhulat se hota rahta tha

koi khalish nahin hoti thi kar dikhane ki

main ik khayal ka khema lagae baitha tha

bahut jagah thi mire pas sar chhupane ki

wo kya khushi thi jo dil mein bahal rahti thi

magar wajh nahin banti thi muskurane ki

ik aise waqt mein wo donon ho gae abad

jahan kisi ko ijazat nahin thi ane ki

ajib dasht tha jo mujh se dad chahta tha

qarib phaile hue dur ke zamane ki

tamam shahr mein puri tarah khamoshi thi

mujhe pari thi koi git gungunane ki