بہت سا کام تو پہلے ہی کر لیا میں نے

بہت سا کام تو پہلے ہی کر لیا میں نے

جہاں جہاں مجھے ڈرنا تھا ڈر لیا میں نے

خلا میں گروی رکھا اپنے سارے خوابوں کو

اور اس زمین پہ چھوٹا سا گھر لیا میں نے

بہت شدید توجہ کا سامنا تھا مجھے

سو اک گلاس کو پانی سے بھر لیا میں نے

خدا جہاز کے اندر سے رزق پھینکتا تھا

خدا کا شکر ہے کچھ کیچ کر لیا میں نے

ہوا میں ہاتھ گھمایا غزل نہیں آئی

اچک کے پھول ہی کاغذ پہ دھر لیا میں نے

تمام دوست سمندر کے پار جانے لگے

پر ایک دل کو تو ساحل پہ دھر لیا میں نے

bahut sa kam to pahle hi kar liya main ne

jahan jahan mujhe darna tha dar liya main ne

khala mein girwi rakha apne sare khwabon ko

aur is zamin pe chhota sa ghar liya main ne

bahut shadid tawajjoh ka samna tha mujhe

so ik gilas ko pani se bhar liya main ne

khuda jahaz ke andar se rizq phenkta tha

khuda ka shukr hai kuchh kaich kar liya main ne

hawa mein hath ghumaya ghazal nahin ai

uchak ke phul hi kaghaz pe dhar liya main ne

tamam dost samundar ke par jane lage

par ek dil ko to sahil pe dhar liya main ne