سامنے آنکھوں کے گھر کا گھر بنے اور ٹوٹ جائے

سامنے آنکھوں کے گھر کا گھر بنے اور ٹوٹ جائے

کیا کرے وہ جس کا دل پتھر بنے اور ٹوٹ جائے

ہائے رے ان کے فریب وعدۂ فردا کا جال

دیکھتے ہی دیکھتے اک در بنے اور ٹوٹ جائے

حادثوں کی ٹھوکروں سے چور ہونا ہے تو پھر

کیوں نہ خاموشی سے دل ساغر بنے اور ٹوٹ جائے

ہم بھی لے لیں لطف تیر نیم کش گر وہ نظر

آتے آتے قلب تک خنجر بنے اور ٹوٹ جائے

ان کے دامن کی ہوا بھی کس کو ہوتی ہے نصیب

آج ہر آنسو مرا گوہر بنے اور ٹوٹ جائے

یوں بکھرتا ہی رہا اے طرزؔ ہر سپنا مرا

صبح جیسے خواب کا منظر بنے اور ٹوٹ جائے

samne ankhon ke ghar ka ghar bane aur tut jae

kya kare wo jis ka dil patthar bane aur tut jae

hae re un ke fareb-e-waada-e-farda ka jal

dekhte hi dekhte ik dar bane aur tut jae

hadson ki thokaron se chur hona hai to phir

kyun na khamoshi se dil saghar bane aur tut jae

ham bhi le len lutf-e-tir-e-nim kash gar wo nazar

ate ate qalb tak khanjar bane aur tut jae

un ke daman ki hawa bhi kis ko hoti hai nasib

aj har ansu mira gauhar bane aur tut jae

yun bikharta hi raha ai tarz har sapna mira

subh jaise khwab ka manzar bane aur tut jae