اسیروں کا عجب کچھ حال یہ صیاد کرتے ہیں

اسیروں کا عجب کچھ حال یہ صیاد کرتے ہیں

کبھی دل شاد کرتے ہیں کبھی ناشاد کرتے ہیں

جنہیں دل میں بسایا تھا جنہیں ہم یاد کرتے ہیں

ہمارے دل کی دنیا کو وہی برباد کرتے ہیں

ہماری یاد تو دل سے بھلا رکھی تھی مدت سے

نہ جانے کس لئے ہم کو وہ پھر سے یاد کرتے ہیں

ستم بھی ہے کرم ان کا سمجھ کر کچھ یہی دل میں

جہان عشق کو ہم شوق سے آباد کرتے ہیں

ہمارے قصر دل کو ڈھا رہے ہو کچھ خبر بھی ہے

اسے برباد کرتے ہو جسے آباد کرتے ہیں

زمین و آسماں روتے ہیں لیکن وہ نہیں روتے

تڑپ کر شدت غم سے جو ہم فریاد کرتے ہیں

قمر بے نور ہوتا ہے ستارے ماند پڑتے ہیں

رخ روشن کو اس کے ہم جو نازیؔ یاد کرتے ہیں

asiron ka ajab kuchh hal ye sayyad karte hain

kabhi dil shad karte hain kabhi nashad karte hain

jinhen dil mein basaya tha jinhen ham yad karte hain

hamare dil ki duniya ko wahi barbad karte hain

hamari yad to dil se bhala rakhi thi muddat se

na jane kis liye ham ko wo phir se yad karte hain

sitam bhi hai karam un ka samajh kar kuchh yahi dil mein

jahan-e-ishq ko ham shauq se abad karte hain

hamare qasr-e-dil ko dha rahe ho kuchh khabar bhi hai

use barbad karte ho jise abad karte hain

zamin-o-asman rote hain lekin wo nahin rote

tarap kar shiddat-e-gham se jo ham fariyad karte hain

qamar be nur hota hai sitare mand parte hain

rukh-e-raushan ko us ke ham jo nazi yad karte hain