ماحول سازگار کرو میں نشے میں ہوں

ماحول سازگار کرو میں نشے میں ہوں

ذکر نگاہ یار کرو میں نشے میں ہوں

اے گردشو تمہیں ذرا تاخیر ہو گئی

اب میرا انتظار کرو میں نشے میں ہوں

میں تم کو چاہتا ہوں تمہیں پر نگاہ ہے

ایسے میں اعتبار کرو میں نشے میں ہوں

ایسا نہ ہو کہ سخت کا ہو سخت تر جواب

یارو سنبھل کے وار کرو میں نشے میں ہوں

اب میں حدود ہوش و خرد سے گزر گیا

ٹھکراؤ چاہے پیار کرو میں نشے میں ہوں

خود طرزؔ جو حجاب میں ہو اس سے کیا حجاب

مجھ سے نگاہیں چار کرو میں نشے میں ہوں

mahaul sazgar karo main nashe mein hun

zikr-e-nigah-e-yar karo main nashe mein hun

ai gardisho tumhen zara takhir ho gai

ab mera intizar karo main nashe mein hun

main tum ko chahta hun tumhen par nigah hai

aise mein etibar karo main nashe mein hun

aisa na ho ke sakht ka ho sakht tar jawab

yaro sambhal ke war karo main nashe mein hun

ab main hudud-e-hosh-o-khirad se guzar gaya

thukrao chahe pyar karo main nashe mein hun

khud tarz jo hijab mein ho us se kya hijab

mujh se nigahen char karo main nashe mein hun