صبح لکھتی ہے ترا نام مری آنکھوں میں

صبح لکھتی ہے ترا نام مری آنکھوں میں

قید تنہائی کی ہے شام میری آنکھوں میں

نیند آتی ہے دعا دے کے چلی جاتی ہے

اشک جب کرتا ہے آرام مری آنکھوں میں

اب ترے نقش کف پا کو مٹانے خوشبو

آئی ہے گردش ایام مری آنکھوں میں

دو قدم ساتھ چلے تب تو بتاؤں اس کو

ہے تری منزل گم نام مری آنکھوں میں

تجھ کو اوروں سے چھپایا ہے ہمیشہ لیکن

صاف دکھاتا ہے ترا نام مری آنکھوں میں

پھر سے آغاز محبت میں کروں تو کیسے

قید ہیں عشق کے انجام مری آنکھوں میں

subh likhti hai tira nam miri ankhon mein

qaid-e-tanhai ki hai sham meri ankhon mein

nind ati hai dua de ke chali jati hai

ashk jab karta hai aram miri ankhon mein

ab tire naqsh-e-kaf-e-pa ko mitane khushbu

ai hai gardish-e-ayyam miri ankhon mein

do qadam sath chale tab to bataun us ko

hai tiri manzil-e-gum nam miri ankhon mein

tujh ko auron se chhupaya hai hamesha lekin

saf dikhata hai tira nam miri ankhon mein

phir se aghaz-e-mohabbat mein karun to kaise

qaid hain ishq ke anjam miri ankhon mein