دکھی دلوں میں، دکھی ساتھیوں میں رہتے تھے

دکھی دلوں میں، دکھی ساتھیوں میں رہتے تھے

یہ اور بات کہ ہم مسکرا بھی لیتے تھے

وہ ایک شخص برائی پہ تل گیا تو چلو

سوال یہ ہے کہ ہم بھی کہاں فرشتے تھے

اور اب نہ آنکھ نہ آنسو نہ دھڑکنیں دل میں

تمہی کہو کہ یہ دریا کبھی اترتے تھے

جدائیوں کی گھڑی نقش نقش بولتی ہے

وہ برف بار ہوا تھی، وہ دانت بجتے تھے

اب ان کی گونج یہاں تک سنائی دیتی ہے

وہ قہقہے جو تری انجمن میں لگتے تھے

وہ ایک دن کہ محبت کا دن کہیں جس کو

کہ آگ تھی نہ تپش بس سلگتے جاتے تھے

کہاں وہ ضبط کے دعوے کہاں یہ ہم گوہرؔ

کہ ٹوٹتے تھے نہ پھر ٹوٹ کر بکھرتے تھے

dukhi dilon mein, dukhi sathiyon mein rahte the

ye aur bat ke ham muskura bhi lete the

wo ek shakhs burai pe til gaya to chalo

sawal ye hai ke ham bhi kahan farishte the

aur ab na ankh na ansu na dharkanen dil mein

tumhi kaho ke ye dariya kabhi utarte the

judaiyon ki ghari naqsh naqsh bolti hai

wo barf bar hua thi, wo dant bajte the

ab un ki gunj yahan tak sunai deti hai

wo qahqahe jo tiri anjuman mein lagte the

wo ek din ke mohabbat ka din kahin jis ko

ke ag thi na tapish bas sulagte jate the

kahan wo zabt ke daawe kahan ye ham gauhar

ke tutte the na phir tut kar bikharte the