دل تمام آئینے تیرہ کون روشن کون

دل تمام آئینے تیرہ کون روشن کون

اب یہ آنکھ ہی جانے دوستوں میں دشمن کون

یا جگر میں خوں کم تھا یا ابھی جنوں کم تھا

دشت کے عوض کرتا ورنہ قصد گلشن کون

اک نشاط آرائی اک سکون تنہائی

ہجر یا وصال اچھا حل کرے یہ الجھن کون

سلسلے محبت کے نام سے نہیں چلتے

اپنی ذات جو تج دے شیخ کیا برہمن کون

اک نئی لگن بخشے اک فقط تھکن بخشے

مردم آزما نکلا رہنما کہ رہزن کون

عشق بے خبر گزرے خیر و شر کے عقدوں سے

آرزو کی سیتا کو رام کون راون کون

خامۂ سخنور یا جذب اندرون گوہرؔ

فن کے سر پہ رکھتا ہے تاج عظمت فن کون

dil tamam aine tira kaun raushan kaun

ab ye ankh hi jane doston mein dushman kaun

ya jigar mein khun kam tha ya abhi junun kam tha

dasht ke ewaz karta warna qasd-e-gulshan kaun

ik nishat arai ik sukun-e-tanhai

hijr ya wisal achchha hal kare ye uljhan kaun

silsile mohabbat ke nam se nahin chalte

apni zat jo taj de shaikh kya barahman kaun

ik nai lagan bakhshe ik faqat thakan bakhshe

mardum azma nikla rahnuma ke rahzan kaun

ishq-e-be khabar guzre khair-o-shar ke uqdon se

arzu ki saita ko ram kaun rawan kaun

khama-e-sukhanwar ya jazb-e-andarun gauhar

fan ke sar pe rakhta hai taj-e-azmat fan kaun