اجلے میلے پیش ہوئے

اجلے میلے پیش ہوئے

جیسے ہم تھے پیش ہوئے

آیا کون کٹہروں میں

ساتھ کٹہرے پیش ہوئے

اپنے سارے جھوٹ کھلے

کس کے آگے پیش ہوئے

اندازے جب ہار گئے

پھر مفروضے پیش ہوئے

شاہ کو شاید مات ہوئی

شاہ کے مہرے پیش ہوئے

عدل کا چشمہ سوکھ گیا

عدل کے پیاسے پیش ہوئے

ہم بھی شاید صاف نہ تھے

ڈرتے ڈرتے پیش ہوئے

لطف تو اس دن آئے گا

جس دن کھاتے پیش ہوئے

گوہرؔ کیا تعزیر لگی

باقی پرچے پیش ہوئے

ujle mele pesh hue

jaise ham the pesh hue

aya kaun katahron mein

sath katahre pesh hue

apne sare jhut khule

kis ke age pesh hue

andaze jab har gae

phir mafruze pesh hue

shah ko shayad mat hui

shah ke mohre pesh hue

adl ka chashma sukh gaya

adl ke pyase pesh hue

ham bhi shayad saf na the

darte darte pesh hue

lutf to us din aega

jis din khate pesh hue

gauhar kya taazir lagi

baqi parche pesh hue