کھو جاؤں مشت خاک میں ایسا نہیں ہوں میں

کھو جاؤں مشت خاک میں ایسا نہیں ہوں میں

دریا ہوں اپنی ذات میں قطرہ نہیں ہوں میں

گزروں گا جس جگہ سے نشاں چھوڑ جاؤں گا

آندھی ہوں اپنے وقت کی جھونکا نہیں ہوں میں

منزل سے یہ کہو کہ کرے میرا انتظار

ٹھہرا ہوا ضرور ہوں بھٹکا نہیں ہوں میں

پوچھی ہے خط میں آپ نے جو خیریت مری

کیسے لکھوں جناب کہ اچھا نہیں ہوں میں

خوشبو ترے بدن کی مرے ساتھ ساتھ ہے

کہہ دے کوئی ہواؤں سے تنہا نہیں ہوں میں

حسن و شباب ساغر و مینا تھے سامنے

لیکن کسی بھی شب کہیں ٹھہرا نہیں ہوں میں

دے کر کھلونے مجھ کو جو بہلا رہے ہیں لوگ

اعجازؔ ان سے کہہ دو کہ بچہ نہیں ہوں میں

kho jaun musht-e-khak mein aisa nahin hun main

dariya hun apni zat mein qatra nahin hun main

guzrunga jis jagah se nishan chhor jaunga

andhi hun apne waqt ki jhonka nahin hun main

manzil se ye kaho ke kare mera intizar

thahra hua zarur hun bhatka nahin hun main

puchhi hai khat mein ap ne jo khairiyat miri

kaise likhun janab ke achchha nahin hun main

khushbu tire badan ki mire sath sath hai

kah de koi hawaon se tanha nahin hun main

husn-o-shabab saghar-o-mina the samne

lekin kisi bhi shab kahin thahra nahin hun main

de kar khilaune mujh ko jo bahla rahe hain log

ejaz un se kah do ke bachcha nahin hun main