خدا اسے بھی کسی دن زوال دیتا ہے

خدا اسے بھی کسی دن زوال دیتا ہے

زمانہ جس کے ہنر کی مثال دیتا ہے

وہ جب شعور کو لفظوں میں ڈھال دیتا ہے

عجیب سوچ نرالے خیال دیتا ہے

کوئی سمجھ نہ سکا اس کی دین کا اندازہ

کبھی خوشی کبھی رنج و ملال دیتا ہے

کبھی وہ زخم لگاتا ہے میرے سینے پر

کبھی وہ پاؤں سے کانٹا نکال دیتا ہے

اسی نے دی ہے گناہ و ثواب کی تفریق

وہی شعور حرام و حلال دیتا ہے

مرے خدا اسے سنجیدگی عطا کر دے

وہ میری بات کو ہنس ہنس کے ٹال دیتا ہے

کبھی کنارے بھی کشتی بچا نہیں سکتے

کبھی بھنور بھی سفینے اچھال دیتا ہے

وہ کر گزرتا ہے اکثر مرا جنوں اعجازؔ

کہ جو خرد کو بھی حیرت میں ڈال دیتا ہے

khuda use bhi kisi din zawal deta hai

zamana jis ke hunar ki misal deta hai

wo jab shuur ko lafzon mein dhal deta hai

ajib soch nirale khayal deta hai

koi samajh na saka us ki din ka andaza

kabhi khushi kabhi ranj-o-malal deta hai

kabhi wo zakhm lagata hai mere sine par

kabhi wo paon se kanta nikal deta hai

usi ne di hai gunah-o-sawab ki tafriq

wahi shuur-e-haram-o-halal deta hai

mire khuda use sanjidagi ata kar de

wo meri bat ko hans hans ke tal deta hai

kabhi kinare bhi kashti bacha nahin sakte

kabhi bhanwar bhi safine uchhal deta hai

wo kar guzarta hai aksar mira junun ejaz

ke jo khirad ko bhi hairat mein dal deta hai