ہر اک تحریر نفرت کی مٹانا چاہتا ہوں میں

ہر اک تحریر نفرت کی مٹانا چاہتا ہوں میں

محبت ہی محبت کا فسانہ چاہتا ہوں میں

فصیلیں نفرتوں کی سب گرانا چاہتا ہوں میں

امیر شہر کا لیکن اشارہ چاہتا ہوں میں

اندھیری رات میں سورج اگانا چاہتا ہوں میں

چراغوں میں لہو اپنا جلانا چاہتا ہوں میں

فلک چھوتے مکانوں کی ہوس تم کو مبارک ہو

فقط سر کو چھپانے کا ٹھکانہ چاہتا ہوں میں

فسادوں سے کسی بھی قوم کو عظمت نہیں ملتی

امیر قوم کو اتنا بتانا چاہتا ہوں میں

نئی تہذیب کا کوئی گلہ شکوہ نہیں مجھ کو

مگر اپنے بزرگوں کا زمانہ چاہتا ہوں میں

کوئی صورت نہیں حالات کے تبدیل ہونے کی

اگرچہ کھل کے ہنسنا مسکرانا چاہتا ہوں میں

جہاں اعجازؔ ہر چہرے پہ شادابی نظر آئے

وہی موسم وہی منظر سہانا چاہتا ہوں میں

har ik tahrir nafrat ki mitana chahta hun main

mohabbat hi mohabbat ka fasana chahta hun main

fasilen nafraton ki sab girana chahta hun main

amir-e-shahr ka lekin ishara chahta hun main

andheri rat mein suraj ugana chahta hun main

charaghon mein lahu apna jalana chahta hun main

falak chhute makanon ki hawas tum ko mubarak ho

faqat sar ko chhupane ka thikana chahta hun main

fasadon se kisi bhi qaum ko azmat nahin milti

amir-e-qaum ko itna batana chahta hun main

nai tahzib ka koi gila shikwa nahin mujh ko

magar apne buzurgon ka zamana chahta hun main

koi surat nahin halat ke tabdil hone ki

agarche khul ke hansna muskurana chahta hun main

jahan ejaz har chehre pe shadabi nazar ae

wahi mausam wahi manzar suhana chahta hun main