حسن کی ریتیں عشق کی رسمیں چھوٹے بچے کیا جانیں

حسن کی ریتیں عشق کی رسمیں چھوٹے بچے کیا جانیں

شوخ ادائیں مبہم باتیں چھوٹے بچے کیا جانیں

سیر ہوئے تو ہنس لیتے ہیں بھوک لگی تو روتے ہیں

صبح بہاراں بھیگی راتیں چھوٹے بچے کیا جانیں

کوہ سمندر صحرا جنگل خوب سمجھ لیتے ہیں لیکن

کیسی ظالم ہیں یہ خلائیں چھوٹے بچے کیا جانیں

سچائی ہے ان کا مذہب اپنی خطا بھی کہہ لیتے ہیں

جھوٹ غبن دھوکے کی راہیں چھوٹے بچے کیا جانیں

پریوں کے افسانے سن کر شہزادے بن بیٹھ گئے

تلخ حقائق وقت کی شکلیں چھوٹے بچے کیا جانیں

لوری سے اعجازؔ وہ اکثر اپنا جی بہلاتے ہیں

گیت غزل قطعے اور نظمیں چھوٹے بچے کیا جانیں

husn ki reten ishq ki rasmen chhote bachche kya janen

shokh adaen mubham baten chhote bachche kya janen

sair hue to hans lete hain bhuk lagi to rote hain

subh baharan bhigi raten chhote bachche kya janen

koh samundar sahra jangal khub samajh lete hain lekin

kaisi zalim hain ye khalaen chhote bachche kya janen

sachchai hai un ka mazhab apni khata bhi kah lete hain

jhut ghaban dhoke ki rahen chhote bachche kya janen

pariyon ke afsane sun kar shahzade ban baith gae

talkh haqaiq waqt ki shaklen chhote bachche kya janen

lori se ejaz wo aksar apna ji bahlate hain

git ghazal qite aur nazmen chhote bachche kya janen