کب وہ تنہائی کے آثار سے گھبرائے ہیں

کب وہ تنہائی کے آثار سے گھبرائے ہیں

لوگ تو رونق بازار سے گھبرائے ہیں

کون کرتا ہے بھلا آبلہ پائی کا گلا

ہم تو بس رستوں کی رفتار سے گھبرائے ہیں

اپنے قامت سے نکلنا پڑا باہر ان کو

جو شجر سایۂ دیوار سے گھبرائے ہیں

لوگ قیمت تو لگائیں گے یہ بازار تو ہے

بے وجہ ہم تو خریدار سے گھبرائے ہیں

کس لئے مانگ رہے ہیں مری دستار وہ لوگ

جو مری جرأت گفتار سے گھبرائے ہیں

ہم کو ایسے نہیں آوارگی سوجھی احسانؔ

ہم تو اپنے در و دیوار سے گھبرائے ہیں

kab wo tanhai ke asar se ghabrae hain

log to raunaq-e-bazar se ghabrae hain

kaun karta hai bhala abla pai ka gila

ham to bas raston ki raftar se ghabrae hain

apne qamat se nikalna para bahar un ko

jo shajar saya-e-diwar se ghabrae hain

log qimat to lagaenge ye bazar to hai

be wajh ham to kharidar se ghabrae hain

kis liye mang rahe hain miri dastar wo log

jo miri jurat-e-guftar se ghabrae hain

ham ko aise nahin awargi sujhi ehsan

ham to apne dar-o-diwar se ghabrae hain