ملا ہے کیسا ترے اعتبار کا موسم

ملا ہے کیسا ترے اعتبار کا موسم

کہ جیسے چاروں طرف ہے بہار کا موسم

اترتی جاتی ہیں کھیتوں میں یاد کی چڑیاں

نکھر رہا ہے مرے سبزہ زار کا موسم

کچھ ایسے موج صبا نے چھوا ہے گالوں کو

کہ دل میں کھلنے لگا برگ و بار کا موسم

نئی رتوں میں ملیں گے اسی جگہ ہم تم

سنبھال رکھنا مرے یار پیار کا موسم

نکھرتی دھوپ تھی اجلے تھے میرے شام و سحر

کہاں سے آیا ہے گرد و غبار کا موسم

ابھی تو اجلا ہے آنگن گلاب تازہ ہیں

گزر ہی جائے نہ قول و قرار کا موسم

کچھ اور کونپلیں پھوٹیں گی پھول آئیں گے

نیا نیا ہے ابھی شاخسار کا موسم

ہر ایک شاخ پہ چاندی ہے کھل رہی احسان

گلوں پہ آیا ہے سولہ سنگھار کا موسم

mila hai kaisa tire etibar ka mausam

ke jaise charon taraf hai bahar ka mausam

utarti jati hain kheton mein yad ki chiriyan

nikhar raha hai mire sabza zar ka mausam

kuchh aise mauj-e-saba ne chhua hai galon ko

ke dil mein khulne laga barg-o-bar ka mausam

nai ruton mein milenge isi jagah ham tum

sambhal rakhna mire yar pyar ka mausam

nikharti dhup thi ujle the mere sham-o-sahar

kahan se aya hai gard-o-ghubar ka mausam

abhi to ujla hai angan gulab taza hain

guzar hi jae na qaul-o-qarar ka mausam

kuchh aur konpalen phutengi phul aenge

naya naya hai abhi shakhsar ka mausam

har ek shakh pe chandi hai khul rahi ehsan

gulon pe aya hai sola singhar ka mausam