اے میرے شہر عشق ترا کیسا بخت ہے

اے میرے شہر عشق ترا کیسا بخت ہے

میں جس کو دیکھتا ہوں وہی لخت لخت ہے

خوش ہو رہا ہوں اس لئے مٹی پہ بیٹھ کر

یارو یہی زمین مرا پہلا تخت ہے

چھاؤں کی جستجو بھی کہاں لے کے آ گئی

صحرا سے پوچھتا ہوں کہیں پر درخت ہے

دنیا مرے مزاج کو سمجھی نہیں ابھی

شاید اسی لئے میرا لہجہ کرخت ہے

اک پل میں کیسے نکلوں میں دنیا سمیٹ کر

ساری زمیں پہ بکھرا ہوا میرا رخت ہے

احسانؔ وہ تو پھول سے نازک لگا مجھے

میں تو سمجھ رہا تھا وہ پتھر سے سخت ہے

ai mere shahr-e-ishq tira kaisa bakht hai

main jis ko dekhta hun wahi lakht lakht hai

khush ho raha hun is liye mitti pe baith kar

yaro yahi zamin mira pahla takht hai

chhaon ki justuju bhi kahan le ke a gai

sahra se puchhta hun kahin par darakht hai

duniya mire mizaj ko samjhi nahin abhi

shayad isi liye mera lahja karakht hai

ik pal mein kaise nakulon mein duniya samet kar

sari zamin pe bikhra hua mera rakht hai

ehsan wo to phul se nazuk laga mujhe

main to samajh raha tha wo patthar se sakht hai