کر گیا گوشہ نشینوں پہ یہ احساں کوئی

کر گیا گوشہ نشینوں پہ یہ احساں کوئی

دے گیا مشغلہ چاک گریباں کوئی

ہے یہی شوق کی پستی و بلندی کا مزاج

فرش کی گرد کوئی عرش کا مہماں کوئی

ضعف و ہمت کے کرشمے ہیں چہ ممکن چہ محال

کام مشکل ہے کوئی اور نہ آساں کوئی

آج وہ دن ہے کہ روشن ہے شبستان خیال

روک دے بڑھ کے ذرا گردش دوراں کوئی

زلف و کاکل کا فسانہ ہو کسی طرح دراز

اس خم و پیچ میں ہے سلسلہ جنباں کوئی

اور بھی زخم ہیں اے چاک گریبان جنوں

تو ہنسے یا نہ ہنسے ہوگا نمایاں کوئی

ایسے صحرا میں جہاں نخل کا سایہ بھی نہ تھا

بڑھ گیا چھوڑ کے تنہا ہمیں احساںؔ کوئی

kar gaya gosha nashinon pe ye ehsan koi

de gaya mashghala chak-e-gareban koi

hai yahi shauq ki pasti-o-bulandi ka mizaj

farsh ki gard koi arsh ka mehman koi

zof-o-himmat ke karishme hain cha mumkin cha muhal

kam mushkil hai koi aur na asan koi

aj wo din hai ke raushan hai shabistan-e-khayal

rok de barh ke zara gardish-e-dauran koi

zulf-o-kakul ka fasana ho kisi tarah daraz

is kham-o-pech mein hai silsila jumban koi

aur bhi zakhm hain ai chak-e-gareban-e-junun

tu hanse ya na hanse hoga numayan koi

aise sahra mein jahan nakhl ka saya bhi na tha

barh gaya chhor ke tanha hamen ehsan koi