کسی نافہم سے اظہار تمنا کرنا

کسی نافہم سے اظہار تمنا کرنا

اپنی خاموش محبت کو ہے رسوا کرنا

ہے ابھی دیر کہ ہو عقل شریک جذبات

شوق کو ہے ابھی ماتم تن تنہا کرنا

کھل سکی ہم سے نہ اب تک غم جاناں کی گرہ

ابھی باقی ہے علاج غم دنیا کرنا

اب یہ گیسو ہیں جو آشفتہ تو کس کا ہے قصور

ہم نے تو چھوڑ دیا عرض تمنا کرنا

زلف کی چھاؤں میں آرام کیا چل نکلا

اک مسافر پہ نہ تھا تم کو بھروسہ کرنا

کچھ کشش میری نظر کو بھی عطا کر اے دوست

تیرے بکھرے ہوئے جلووں کو ہے یکجا کرنا

تم کو احسانؔ مبارک ہو یہ انداز جمیلؔ

رنگ اپنا بھی مگر چاہیئے پیدا کرنا

kisi nafahm se izhar-e-tamanna karna

apni khamosh mohabbat ko hai ruswa karna

hai abhi der ke ho aql sharik-e-jazbat

shauq ko hai abhi matam tan-e-tanha karna

khul saki ham se na ab tak gham janan ki girah

abhi baqi hai ilaj-e-gham-e-duniya karna

ab ye gesu hain jo ashufta to kis ka hai qusur

ham ne to chhor diya arz-e-tamanna karna

zulf ki chhaon mein aram kiya chal nikla

ik musafir pe na tha tum ko bharosa karna

kuchh kashish meri nazar ko bhi ata kar ai dost

tere bikhre hue jalwon ko hai yakja karna

tum ko ehsan mubarak ho ye andaz jamil

rang apna bhi magar chahiye paida karna