Arooz is now on the App Store, for iPhone and iPad. Download →

All poetry

خیال و خواب کی باتوں کو دہرانے سے کیا ہوگا

Ehsan Darbhangavi (1922–1998)

خیال و خواب کی باتوں کو دہرانے سے کیا ہوگا

حقیقت سامنے ہے جب تو افسانے سے کیا ہوگا

خرد سے جو نہیں ممکن جنوں وہ کر دکھاتا ہے

غلط ہے جو یہ کہتے ہیں کہ دیوانے سے کیا ہوگا

اگر دریا میں رہنا ہے بہانا سیکھ موجوں سے

خس و خاشاک کی مانند بہہ جانے سے کیا ہوگا

اسی احساس سے پیدا ہوئی ہے فکر آزادی

قفس میں اس طرح گھٹ گھٹ کے مر جانے سے کیا ہوگا

شکستہ ساز سے نغمے کبھی پیدا نہیں ہوتے

تمہاری انگلیوں کے شوق فرمانے سے کیا ہوگا

دیے آنکھوں کے دونوں بجھ گئے جب رات بھر جل کر

تو ہنگام سحر یوں بے حجاب آنے سے کیا ہوگا

عطا کرنا ہے احساںؔ بزم کو سوز جگر اپنا

برنگ شمع یوں خاموش جل جانے سے کیا ہوگا