طاری مرے شعور پہ وجدان ہی رہا

طاری مرے شعور پہ وجدان ہی رہا

آیا خودی کو ہوش تو اک آن ہی رہا

تھا حوصلہ کہ دامن حیراں کریں گے چاک

ہاتھوں میں لیکن اپنا گریبان ہی رہا

پھر تو وہی تھی دھوپ وہی دھوپ کا سفر

زلفوں کی چھاؤں میں بھی تو مہمان ہی رہا

احسان تیرے عشق کا کیا حق ادا کرے

اس پہ تو اس کی عقل کا فیضان ہی رہا

احساں خراب چشم عنایت نہ ہو سکا

یہ بھی تو اک لحاظ سے احسانؔ ہی رہا

tari mire shuur pe wijdan hi raha

aya khudi ko hosh to ik an hi raha

tha hausla ke daman-e-hairan karenge chak

hathon mein lekin apna gareban hi raha

phir to wahi thi dhup wahi dhup ka safar

zulfon ki chhaon mein bhi to mehman hi raha

ehsan tere ishq ka kya haq ada kare

us pe to us ki aql ka faizan hi raha

ehsan kharab chashm-e-inayat na ho saka

ye bhi to ik lihaz se ehsan hi raha