Arooz is now on the App Store, for iPhone and iPad. Download →

All poetry

شاعر ہوئے تو کیا ہوئے احسانؔ ہی رہے

Ehsan Darbhangavi (1922–1998)

شاعر ہوئے تو کیا ہوئے احسانؔ ہی رہے

مرزاؔ و میرؔ بن نہ سکے خان ہی رہے

امکاں کے دائرے کو جو وسعت نہ دے سکے

اپنے حدود ذات کا عرفان ہی رہے

جب دل ہو مضطرب تو کہاں تک خودی کی لاج

اے ناز حسن آج تری آن ہی رہے

آہٹ کسی کے پاؤں کی آئی نہ صبح تک

ہم دل کی دھڑکنوں کے نگہبان ہی رہے

پہنچا نہ دست شوق جو دامان یار تک

بے شغل کیوں ہو اپنا گریبان ہی رہے

ہے التجائے شوق میں بھی طنطنہ وہی

احسانؔ عشق کرکے بھی احسانؔ ہی رہے