زبان مے کدہ میں جس کو مے کش جام کہتے ہیں

زبان مے کدہ میں جس کو مے کش جام کہتے ہیں

اسے ہم اپنے دل کا دوسرا اک نام کہتے ہیں

حدیث زلف و رخ کیا حال صبح و شام کہتے ہیں

غم جاناں کے پردے میں غم ایام کہتے ہیں

تبسم نے کہی تھی داستاں آغاز الفت کی

سنو اب آنسوؤں سے قصۂ انجام کہتے ہیں

تمہاری انکھڑیوں میں ہے سحر گنگا کے ساحل کی

مگر مے خوار اس کو میکدے کی شام کہتے ہیں

تری زلف سیہ سے خال رخ کا جو بھی رشتہ ہو

اسیران محبت دانہ زیر دام کہتے ہیں

ترے درد محبت کو زمانہ اک مرض کہہ لے

مگر ہم تو علاج گردش ایام کہتے ہیں

دل افسردہ کو احسانؔ تم شمع سحر کہہ لو

مگر احباب تو اس کو چراغ شام کہتے ہیں

zaban-e-mai kada mein jis ko mai kash jam kahte hain

use ham apne dil ka dusra ik nam kahte hain

hadis-e-zulf-o-rukh kya hal subh-o-sham kahte hain

gham janan ke parde mein gham-e-ayyam kahte hain

tabassum ne kahi thi dastan aghaz-e-ulfat ki

suno ab ansuon se qissa-e-anjam kahte hain

tumhari ankhriyon mein hai sahar ganga ke sahil ki

magar mai khwar us ko maikade ki sham kahte hain

tiri zulf-e-siyah se khal-e-rukh ka jo bhi rishta ho

asiran-e-mohabbat dana zer-e-dam kahte hain

tire dard-e-mohabbat ko zamana ik maraz kah le

magar ham to ilaj-e-gardish-e-ayyam kahte hain

dil-e-afsurda ko ehsan tum sham-e-sahar kah lo

magar ahbab to us ko charagh-e-sham kahte hain