خلش بخشی تپش بخشی گداز اپنا دیا میں نے

خلش بخشی تپش بخشی گداز اپنا دیا میں نے

مزاج حسن کو بھی کر دیا غم آشنا میں نے

خرد نے چارہ سازی کی جنوں نے رہنمائی کی

بڑی مشکل سے پایا سایۂ زلف رسا میں نے

خجل ہوں میں کہ احساس فراغت چھین کر تم سے

غم آرائش کاکل تمہیں کیوں دے دیا میں نے

ہوائیں تند موسم نا موافق باغباں برہم

عجب عالم میں رکھی ہے نشیمن کی بنا میں نے

علاج درد دل مشکل تھا لیکن ہو گیا آساں

محبت کو خودی کا اک نیا نسخہ دیا میں نے

میں کہتا تھا کہ عقل و عشق میں رشتہ نہیں ممکن

مگر اب سوچتا ہوں یہ گریباں کیوں سیا میں نے

خدا کا شکر ہے احسانؔ اس دور تنفر میں

فراہم کر لئے ہیں چند ارباب وفا میں نے

khalish bakhshi tapish bakhshi gudaz apna diya main ne

mizaj-e-husn ko bhi kar diya gham ashna main ne

khirad ne chara sazi ki junun ne rahnumai ki

bari mushkil se paya saya-e-zulf-e-rasa main ne

khajil hun main ke ehsas-e-faraghat chhin kar tum se

gham-e-araish-e-kakul tumhen kyun de diya main ne

hawaen tund mausam na muafiq baghban barham

ajab alam mein rakhi hai nasheman ki bana main ne

ilaj-e-dard-e-dil mushkil tha lekin ho gaya asan

mohabbat ko khudi ka ik naya nuskha diya main ne

main kahta tha ke aql-o-ishq mein rishta nahin mumkin

magar ab sochta hun ye gareban kyun siya main ne

khuda ka shukr hai ehsan is daur-e-tanaffur mein

faraham kar liye hain chand arbab-e-wafa main ne