یاد تیری جو کبھی آتی ہے بہلانے کو

یاد تیری جو کبھی آتی ہے بہلانے کو

اور دیوانہ بنا جاتی ہے دیوانے کو

تم محبت بھری نظروں سے اسے دیکھ تو لو

نیند کانٹوں پہ بھی آ جاتی ہے دیوانے کو

ہم بتائیں گے تمہیں شانہ و گیسو کے رموز

ختم کر لو حرم و دیر کے افسانے کو

اس کو محفل میں جو دیکھا تپش غم کا شریک

لے لیا شمع نے آغوش میں پروانے کو

بادہ کش واعظ کج فہم سے کیا بحث کریں

اس نے دیکھا ہے بہت دور سے میخانے کو

آپ زلف اپنی سنوارا کئے اور دنیا نے

آپ سے چھین لیا آپ کے دیوانے کو

جب نہ احسانؔ رہے گا نہ کہانی اس کی

آپ دہرائیں گے احسانؔ کے افسانے کو

yad teri jo kabhi ati hai bahlane ko

aur diwana bana jati hai diwane ko

tum mohabbat bhari nazron se use dekh to lo

nind kanton pe bhi a jati hai diwane ko

ham bataenge tumhen shana-o-gesu ke rumuz

khatm kar lo haram-o-dair ke afsane ko

us ko mahfil mein jo dekha tapish-e-gham ka sharik

le liya shama ne aghosh mein parwane ko

bada kash waiz-e-kaj fahm se kya bahs karen

us ne dekha hai bahut dur se maikhane ko

ap zulf apni sanwara kiye aur duniya ne

ap se chhin liya ap ke diwane ko

jab na ehsan rahega na kahani us ki

ap dohraenge ehsan ke afsane ko